Of ísabrot

Drók eik á flot
of ísabrot
(hratt ég knerrinum á flot um vorið),
segir í Höfuðlausn Egils Skalla-Grímssonar, en þar merkir ísabrot vor.
Laugardaginn 23. febrúar 2013 vorum við hjónin á ferð um Austur-Skaftafellssýslu. Við námum staðar við jökullónið á Breiðamerkursandi og hljóðrituðum ósköpin sem á gengu. Stríður straumur var um ósinn og mætti hann yfirgangi Ægis konungs, sem hefur sér það til dundurs að eyða landinu. Virðist hann stefna að því að rjúfa þar hringveginn.
Ekki var dregið úr lágtíðninni og koma því andstæður hljóðanna vel í ljós. Heyra má jakana molna sundur í hamaganginum.
Hljóðritað var með Nagra Ares BB+ ogb Røde NT-2a hljóðnema ásamt Sennheiser ME-64 í MS-uppsetningu. Inngangsstyrkur síðarnefnda hljóðnemans var lækkaður um 6 db til þess að ná meiri hljóðdreifingu.
Ljósmyndina tók Elín árnadóttir.

 

The Breiðamerkursandur, Southeast-Iceland, is a magnificient place with the glaciers to the north and the Atlantic Ocean to the south. On February 23 Elin and I recorded the sounds of the streaming water from the lagoon to the sea, with the noise of the ocean to the left and the water with breaking ice infront.
A Nagra Ares BB+ was used together with a Rode NT-2A and a Sennheiser ME-64 in an MS-setup.
The photographer was my wife, Elín Árnadóttir.

Skrár tengdar þessari bloggfærslu:

• Það gengur talsvert á. Lónið ryður sig, ísjakar molna og hafið tekur á þeim ómjúkum höndum (hljóðrit frá 23. febrúar 2013)

Athugasemdir

[Magnús Bergsson, 27.2.2013 kl. 02:24]

Þú nærð þessu snilldar vel með þessum ólíku hljóðnemum. En það leynir sér þó ekki að þetta er MS upptaka.

Mikið ósköp vildi ég geta komist þarna austur. Með hljóð- og vatnanema að vopni. Það er orðið alveg skelfilegt hvað maður ferðast lítið um landi. Einmitt þegar maður er komin með tæki og tól til að nema og miðla því sem flestir missa af eða vita ekki um.

[Arnþór Helgason, 27.2.2013 kl. 08:36]

Þakka þér fyrir þetta, Magnús. Af fáum hef ég lært meira en af þér. Vissulega væri hægt að ná þessu á annan hátt með öðruvísi uppsetningu. Ég hálfsá eftir að hafa ekki tekið með tvo NT-2A og sett þá upp í AB-uppsetningu eða þá tvo NT-1A í NOS. Það hefði gefið aðra mynd. Reyndar hefði ég einnig getað notað NT-2A í NOS-uppsetningu með því að stilla þá á nýru eða jafnvel VP88, en ég hef ekki notað hann til umhverfishljóðritana í þrjú ár.

Ég hef verið nokkuð sáttur við MS-uppsetninguna þegar um náttúruhljóð er að ræða og jafnvel fundarhljóðrit. Vandinn getur verið sá að ákveða hljóðdreifinguna. Vissulega er hægt að gera það í eftirvinnslu, en reynsla mín er sú að best sé að ná slíkum stillingum á vettvangi.

Það er vissulega rétt að Rode og Sennheiser eru gjörólíkir. Mér finnst þó hátíðnisvið Sennheiser henta mjög vel í þessu tilviki. Þannig undirstrika NT-2A betur umhverfið sjálft og hljóðritið verður einhvern veginn hnitmiðaðra.

Ég þigg þakksamlega allar athugasemdir og tillögur um úrbætur.