Ókeypis þjófavörn

Á skrifstofu einni í Nóatúni 17 í Reykjavík ískrar hátt í lömum hurðarinnar sem er fyrir dyrunum fram á stigaganginn. Einn starfsmaðurinn sagði að þetta væri besta þjófavörn sem fundin hefði verið upp. Því þótti tilhlýðilegt að hljóðrita ískrið um leið og gengið var út af skrifstofunni.

Skrár tengdar þessari bloggfærslu:

• Ískur í hurðarlömum (hljóðrit)

Íslenskan á Umferðarmiðstöðinni

 

Í dag átti ég leið á Umferðarmiðstöðina við Vatnsmýri í Reykjavík. Þar er starfsfólkið lipurt og vill viðskiptavinum allt hið besta.

Nokkuð virðist skorta á þjálfun sumra sem þar eru við störf. Ég fékk mér sæti í biðsalnum og dró upp Olympus LS-11 varahljóðritann, en hann hefur nýlega hlotið 3. verðlaun sem tækninýjung ársins 2010 á sviði hljóðrita. Hugðist ég hljóðrita umhverfið eins og stundum áður. Fremur lítil umferð var um miðstöðina. Þó mátti heyra rennihurðina fara fram og aftur um dyraopið, skemmtilegt skóhljóð, ferðatösku dregna áfram, mas og skvaldur.

Í tvígang var kallað í hátalarakerfi hússins. Fyrri tilkynningin skildist alls ekki. Ef grannt er hlustað á seinni tilkynninguna, sem hefst á 27. sek. 3. mínútu (02:27) heyrist ekki betur en að farþeggar til Hveragerði, Selfoss, Hvolsvöllur, Flúðir og Borgarfjörður séu beðnir að ganga um borð - ekkert eignarfall.

Íslendingar hafa furðulítinn metnað fyrir hönd þjóðtungu sinnar á sjálfu afmælisári Jóns Sigurðssonar. Væri ekki ráð að kenna starfsfólki Umferðarmiðstöðvarinnar hvernig eigi að lesa slíkar tilkynningar? Ætli tilkynningalestur sé kenndur á ferðamálabrautum framhaldsskólanna?

Hljóðritað var rétt fyrir kl. 17:00 á 24 bitum, 44,1 kílóriðum. Notaður var Olympus LS-11 hljóðriti með áföstum hljóðnemum.

Skrár tengdar þessari bloggfærslu:

• Umferðarmiðstöðin í Reykjavík síðdegis 27. febrúar 2011 (hljóðrit)

Greinilegri leiðsögn í strætó

Í gær hitti ég gamlan kunningja minn sem er strætisvagnastjóri. Tókum við tal saman um leiðsögnina í strætó og var hann mér sammála um að hún væri sennilega alls staðar of lágt stillt. Við tókum saman leið tvö sem kom að Hlemmi um kl. 16:20, en þar greindist vart nokkurt orð.

Í morgun, 25. febrúar, tók ég leið 11 austur á Hlemm. Kom vagninn þangað um kl. 09:45. Samkvæmt ábendingu settist ég fremst í vagninn, aftan við bílstjórabúrið, en þar á leiðsögnin að vega greinilegust. Ég greindi nokkurn veginn orðaskil. Fátt ar í vagninum en bílstjórinn hafði útvarpið sæmilega hátt stillt svo að sennilega hefur popptónlistin borist víða um vagninn. Í þessum vagni er leiðsögnin stillt með því hæsta sem gerist. Hún er væntanlega gagnslaus heyrnarskertu fólki og þegar farþegar masa sín á milli.

Þetta hljóðblogg var fyrst og fremst hugsað mönnnum til fræðslu og fróðleiks en ekki itl sem baráttutæki. En lífið er barátta, sagði Mao formaður og því ber að virkja hvað sem er sem getur orðið góðum málstað að liði.

Hljóðritað var með Olympus LS-11 á 44,1 kílóriðum og 24 bitum.

Skrár tengdar þessari bloggfærslu:

• Leið 11 í vesturbæ Reykjavíkur. Leiðsögnin er með því hæsta sem þá gerðist en samt of lág (hljóðrit).

Leiðsögnin í strætisvögnum

Ýmsir fögnuðu því þegar leiðsögn var sett í strætisvagna hér á landi. Vegna kvartana var kerfið svo lágt stillt að það nýttist engum. Einhver bót hefur verið ráðin þar á en styrkurinn er ekki nægur. Sums staðar, og ég óttast að það eigi við um flesta vagnana, heyrist ekki hvað sagt er og hef ég iðulega heyrt farþega kvarta undan þessu. Vísa ég m.a. til umræðna á blogginu

http://gislihelgason.blog.is

Í gær og í dag hef ég verið á ferðinni með strætó, alls 7 sinnum. Einungis í eitt skipti mátti greina hvað sagt var.

Ég býð hlustendum að athuga hvort þeir greini orðaskil í meðfylgjandi hljóðritum. Athugasemdir verða vel þegnar.

Skrár tengdar þessari bloggfærslu:

• Á leið vestur á Seltjarnarnes með leið 13 22. febrúar 2011 (hljóðrit)
• Á leið að JL-húsinu með leið 13 23. febrúar 2011 (hljóðrit)
• á leið á Hlemm með leið 11 23. febrúar 2011 (hljóðrit)

Íslenskur fimundarsöngur á Iðunnarfundi

 

Bræðurnir Sigursveinn og Örn Magnússynir, sem skipa með öðrum fjölskylduhljómsveitina Spilmenn Ríkínís, komu á fund í Kvæðamannafélaginu Iðunni föstudaginn 8. janúar síðastliðinn og fluttu nokkur þjóðlög, einkum tvísöngva. fyrst á dagskrá þeirra var kvæðið um Bakkabræður eftir Jóhannes úr Kötlum, sem þeir kváðu við þjóðlag, sennilega úr Ólafsfirði. Leyfðu þeir ritstjóra þessarar síðu að birta hljóðritið. Ástæða er til að benda hlustendum á einstaklega fágaðan flutning þeirra, en sjaldgæft er að heyra íslenskan fimmundarsöng jafnvel fluttan.

Í fyrra gáfu Spilmenn Ríkínis út hljómplötu með íslenskum þjóðlögum. Á diskinum er leikið undir á ýmis miðaldahljóðfæri. Vitað er að einhver slík hljóðfæri voru til hér á landi. Efast má um að þjóðlög þessi hafi nokkru sinni verið jafnvel flutt og raun ber vitni um.

Hljómdiskur Spilmanna Ríkínís ætti að vera skyldueign allra unnenda íslenskrar þjóðlagatónlistar.

 

Skrár tengdar þessari bloggfærslu:

• Sigursteinn og Örn Magnússynir flytja íslensk tvísöngsþjóðlög (hljóðrit frá 8. janúar 2011)

Kuldaboli

Þegar ég var barn trúði ég á Kuldabola. Mér fannst hann skelfileg skepna og það lét stundum hátt í honum.

Kuldaboli hélt sig stundum í stiganum niður í kjallara og það heyrðist í honum gegnum skráargatið á hurðinni, þessi margtóna, síbreytilegi hvinur. Nautin í Hábæ og í Dölum öskruðu eða bölvuðu, en Kuldaboli var engu skárri.

Þegar ég kom heim frá því að selja Viðskiptablaðið í gær hvein suðvistanáttin í örmjórri gætt á stofuglugganum. Ég lagði Olympus LS11 í gluggakistuna og hvarf á braut. Hljóðneminn nam einræður Kuldabola. Glöggir hlustendur heyra einnig tifið í stofuklukkunni og einhver hljóð að utan.

Hljóðritið nýtur sín best í góðum heyrnartólum. Ef einhver á ljósmynd af Kuldabola væri hún vel þegin.

Skrár tengdar þessari bloggfærslu:

• Kuldaboli blæs fyrir utan gluggann minn (hljóðrit)

Birgir Þór 6 ára

Þriðjudaginn 15. febrúar verður Birgir Þór Árnason 6 ára. Þótt aldurinn sé ekki hár verða ýmis tímamót þegar menn komast á 7. ár. Þeir byrja í skóla, verða grunnskólanemar í stað leikskólanema, mi ssa tennur og sitthvað fleira, sem markar spor í vitund þeirra.

Á þessum tímamótum þótti rétt að taka kappann tali og forvitnast um framtíðaráætlanir hans.

Skrár tengdar þessari bloggfærslu:

• Birgir Þór Árnason segir frá væntanlegum breytingum á högum sínum (hljóðrit 13. febrúar 2011)

Rjómaís með bjórbragði

Um þessar mundir h efur eini stjórnarmaður Maoíska ísklúbbsins, sem staddur er á Íslandi, kjörið ísbúðina við Laugalæk og Ís-land í Suðurveri við Kringlumýrarbraut í Reykjavík skemmtilegustu ísbúðir Reykjavíkur. Eigendur búðanna eru báðar konur.

Þykir rétt að tilnefna Erluís við Faxafen heilnæmustu ísbúð borgarinnar, en þar fæst sykurskertur eða jafnvel sykurlaus ís.

Einn góðan veðurdag í febrúar, skömmu fyrir kvöldfréttir Ríkisútvarpsins, settumst við niður og gæddum okkur á ís. Stjórnarmaður Maoíska ísklúbbsins fékk sér rjómaís með bjór frá Kalda og kom hann á óvart.

Hljóðriti var í vasanum og var hann dreginn upp. Gjörið svo vel að hlusta á hljóðritið í góðum hljómtækjum eða heyrnartólum og njótið íssins.

Skrár tengdar þessari bloggfærslu:

• Rjómaís með bjór frá Kalda (hljóðrit úr Ís-landi frá 12. febrúar 2011)

Litla hagyrðingamótið 4. febrúar 2011

 

Á litla hagyrðingamótinu, sem haldið var á síðasta fundi Kvæðamannafélagsins Iðunnar 4. febrúar síðastliðinn, var ort um súrt, rammt og sætt. Helgi Zimsen stýrði mótinu að vanda. Auk hans komu fram þeir Gunnar Thorsteinsson og Höskuldur Búi Jónsson. Ingi Heiðmar Jónsson forfallaðist og flutti Helgi vísur hans.

 

Skrár tengdar þessari bloggfærslu:

• Litla hagyrðingamótið 4. febrúar 2010 (hljóðrit)

Þorravísur á Iðunnarfundi eftir Helga Zimsen

 

Á fundi Kvæðamannafélagsins Iðunnar, sem haldinn var 4. febrúar 2011, fluttu Iðunnarfélagar tvo vísnabálka eftir Helga Zimsen. Fyrri bálkurinn fjallar um íslenskan mat. En þar sem ekki var snæddur íslenskur matur á fundinum nema þá pönnukökur, fór Rósa Jóhannesdóttir, formaður rímnalaganefndar, þess á leit við Helga að hann orti eina lokavísu. Þær urðu 7 og mátti hún velja eina þeirra. Hún kaus að láta flytja þær allar vegna valkvíða.

 

 

Matargikksbálkur

 

Aftur kominn enn á ný

árs er víst á fresti

ýmsir blóta þorra því

þá er úldnað nesti.

 

Freðinn ref ef finn á grund

fráleitt neita að borð'ann

úldna rollu eða hund

allt má drýgja forðann.

 

Gamalt nesti nörtum í

næring feðra vorra

borðum þetta bara af því

blóta verðum þorra.

 

Hákarl siginn sigla fær

svona oní maga:

brennivín um bitinn rær

bragð má þannig laga.

 

Súrinn virðist sumum best

sviðin aðrir kjósa

háfsins illri ýldupest

ýmsir jafnvel hrósa.

 

Sviðin eru mönnum mæt

metið þau við getum

snoppan er svo ósköp sæt

að við hana étum.

 

Þorra blóta, yrki óð,

önd og búknum hlýnar.

Finnst mér þá sem flæði blóð

fornt um æðar mínar.

 

Kjaftur bítur, lína er lögð

lengst úr fyrri tíma.

Þorrakrása kynleg brögð

kýs ég við að glíma.

 

Gengnir áar gæddu sér

á gömlum mat og þráum,

vegna þessa í veislu hér

vistir góðar fáum.

 

Punga þunga og súran sel

með sviði í kviðinn læði.

Metið get ég magál vel,

mikið spikið snæði.

 

(Helgi Zimsen)

 

Ábótarvísur

 

Kvæðamannafundir fljótt

fylla gesti kæti.

Flæðir rímið fram á nótt

fjörið held það bæti.

 

Iðunn glæðist óðs á stund,

örvast fjör og gaman.

Gamlar hefðir gleðja lund,

glöggt það finnum saman.

 

Hér nú yrkjum hress og slyng.

Hér er skáldafákur.

Hér er ekkert hrafnaþing.

Hér eru engar krákur.

 

Gaman er á gleðistund,

gefst þó fátt að éta.

Kvæðamannakempufund

kann ég vel að meta

 

Enn við kveðum eina stund,

óð í góðum hópi

Heftir ekki hal og sprund

hér þótt Steindór skrópi.

 

Þorrin eru þessi ljóð

þau við kváðum saman

þó að blóti einhver óð

ekki súrnar gaman.

 

Víst hér enda verðum brag

vísnaflóði lýkur.

Nú er fundið lokalag

línan hinsta fýkur.

 

(Helgi Zimsen)

Skrár tengdar þessari bloggfærslu:

• Matargikksbálkur eftir Helga Zimsen. Iðunnarfélagar kveða undir stjórn Rósu Jóhannesdóttur (hljóðrit frá 4. febrúar 2011)
• Ábótarvísur eftir Helga Zimsen. Iðunnarfélagar kveða undir stjórn Rósu Jóhannesdóttur (hljóðrit frá 4. febrúar 2011)