Leiðsögnin hækkuð í strætisvögnum

Í kvöld barst mér tölvupóstur frá verkefnisstjóra hjá Strætó þar sem greint var frá þvi að nú hefði leiðsögnin í 20 vögnum verið hækkuð. Var óskað álits.

Í dag fór ég fjórar ferðir með strætisvagni og í síðasta vagninum, Leið 11, sem ók út á Seltjarnarnes, var leiðsögnin ásættanleg. Vasahljóðriti var með í för og því fylgir hljóðsýni með þessari færslu.

Skrár tengdar þessari bloggfærslu:

• Mikil bót er að skýrri leiðsögn í strætisvögnum (hljóðrit)

Fælnir fuglar

 

Á hljóðmyndasíðu Magnúsar Bergssonar er margvíslegt efni á boðstólnum. Nú síðast birti hann hljóðritið fælna Fugla þar sem er heldur betur handagangur í öskjunum.

Ástæða er til að benda á þetta snilldarhljóðrit og ýmislegt fleira sem er á síðunni.

http://fieldrecording.net/

Sunnudagsmorgunn

Hjá Gísla Halldórssyni, leikara, hófst sumarið 1. mars og veturinn gekk í garð 1. nóvember. Hvað um það, vorið er í nánd.

Í morgun setti ég Olympus LS-11 inn í svamphólk, kom á það þrífæti og setti út á svalir til þess að fanga fuglasönginn og fjarlægt brimhljóðið. Fjarlæg umferðin um Eiðisgrandann heyrðist einnig. Aðalhlutverk léku þrestir, starrar og einn tjaldur.

Skrár tengdar þessari bloggfærslu:

• Í morgunkyrrðinni magnar hljóðritinn andardrátt hafsins, þyt golunnar, umferðarym og fuglasöng (hljóðrit).

Hlustað á Listasafni Íslands

http://listasafn.is/?expand=38-47&i=47

Skrár tengdar þessari bloggfærslu:

• Hljóðumhverfið er fjölbreytilegt á Listasafni Íslands, ómstríða, rafrænn hávaði, síðustu andvörpin og kyrrðin með daufum hljóðum hússins (hljóðrit 26. mars 2011)

Hestagerði eða hestaskjól

Fyrir nokkru ræddi ég við merkisklerk á Norðurlandi, mikinn dýravin. Sagðist hann þá skömmu áður hafa farið sunnan úr landi norður yfir Holtavörðuheiði og þvælst síðan yfir nær ófærar heiðar allt til þess að hann náði háttum á prestsetri sínu. Í Húnavatnssýslum, sem hann lýsti sem miklum órofasléttum, sá hann fjölda hrossa sem reyndu að hama sig en gátu hvergi leitað skjóls fyrir ofviðrinu. Blöskraði honum mjög sinnuleysi eigandanna sem ekki hefðu erft alúð Ásmundar, bónda á Bjargi, föður Grettis hins sterka. Sagðist klerkur ætla að rita um þetta grein þegar sér rynni reiðin. Var honum þá bent á gamla latneska orðtækið, "Ira furor brevis est" (Reiðin er eitt stutt æði).

 

Þessi reiðilestur klerksins minnti mig á að við Elín sáum mannvirki nokkur á leið okkar um Reykhólasveit 25. júní árið 2009. Voru þau gerð úr bárujárni og augsýnilega hestagerði eða skjól. Reyndar fór það vart á mili mála því að nóg var af hrossataði við gerðið sem við skoðuðum og fjöldi flugna.

 

Hljóðumhverfið var sérstakt. Innlögnin var hvöss og það hvein í bárujárninu. Ég geri mér ekki grein fyrir hvort suðið sem heyrist í hljóðritinu, stafaði frá gróðrinum eða hvort um bilun í leiðslu var að ræða.

Ljósmyndina tók Elín Árnadóttir.

 

 

Skrár tengdar þessari bloggfærslu:

• Hljóðnemanum snúið að bárujárninu - flugurnar una glaðar við sitt (hljóðrit)
• Hljóðnemanum snúið frá veggnum. Stelkurinn er á varðbergi (hljóðrit)

Kalsasamt ástarkrunk

Í dag setti ég tvo ME-64 hljóðnema út á svalir með loðhlífum. Ætlunin var að bera þá saman við ME-62. Stynningskaldi var á af suðvestri og rúmlega það. Því var kjörið tækifæri til slíks samanburðar.

Ég hugðist einungis gera skammvinna tilraun, en tveir hrafnar krunkuðust á í næsta nágrenni og voru greinilega hrifnir hvor af öðrum. Virtust þeir hafa allan hugann við ástarleik sinn og létu rokið ekkert á sig fá. Mér þótti hins vegar miður hvað vindurinn var hávaðasamur.Ég hélt því áfram og ákvað að láta afraksturinn flakka.

Skömmu eftir að hrafnarnir höfðu lokið sér af setti ég Sennheiser ME-62 upp með loðhlífum. Sem vænta mátti þoldu þeir betur saggaganginn í Kára. Í báðum hljóðritunum var skorið af 80 riða tíðninni í eftirvinnslu. Frumritið var hljóðritað með Nagra Ares BB+ og þá skorið af 100 riðunum.

Skrár tengdar þessari bloggfærslu:

• Hvorki virðast atlotin blíð né veðrið (hljóðrit)
• Vindgnauð og fjarlægur brimgnýr (hljóðrit)

Spólað í snjó og hálku

 

Undanfarið hafa ýmsir bílar setið fastir í snjó og sumir spólað allt hvað af tekur. Hljóðneminn nam athubðarás þá sem hér heyrist. Með samstilltu átaki tókst að koma bifreiðinni af stað.

                        Þeir sem hafa gaman af bifreiðahljóðum og spóli ættu að fá hér eitthvað við sitt hæfi.

 

Skrár tengdar þessari bloggfærslu:

• Hjálpsamir nágrannar aðstoða bílstjóra i vanda (hljóðrit)

Morgunsöngur hefilsins

Ég hafði andvara á mér sunnudagsmorguninn 13. mars 2011, en helsti of lengi. Ég undirbjó allt kvöldið áður, hlóð rafhlöðurnar og setti hljóðnema í vindhlíf. Leiðslur voru tengdar.

Ég hugsaði mér til hreyfings kl. 06:30 en þá ók bíll framhjá eftir Nesveginum. Klukkan varð sjö og síðan hálf átta. Þá drattaðist ég fram úr og um kl. 8 var hljóðneminn kominn út á svalir. Þar sungu fuglarnir sem aldrei fyrr.

Ég byrgði allar gættir sem vissu í suður og ýtti hljóðritanum í gang. En Adam var ekki lengi í Paradís. Eftir Nesveginum kom hefill akandi og ruddi burtu snjó því að það hafði snjóað alla nóttina og næsta klukkutímann hamaðist hann á bílastæðinu við Hagkaup svo að svangir ökumenn gætu keypt handa sér og sínum í matinn.

Til er um klukkustundar langt hljoðrit af þessu, en hér er upphafið.

Notaður var Nagra Ares BB+ og Shure VP88 hljóðnemi.

Skrár tengdar þessari bloggfærslu:

• Hefill hreinsar snjó (hljóðrit)

Fjölbreytileg hljóð hrafna

Það reyndist meira af krummakrunki frá sunnudeginum 13. mars 2011 á minniskorti Nagrans en ég hugði.

Í fyrra hljóðritinu slettir krummi í góm með ýmsum tónbrigðum og í hinu seinna krunkar hann í eins konar níund.

Umferð ökutækja spillir nokkuð fyrir en þetta er veruleiki þess samfélags sem Íslendingar hafa kjörið sér.

Væri ekki ráð að stofna hagsmunasamtök hljóðritara og banna alla umferð vélknúinna ökutækja svo sem einu sinni á hverjum ársfjórðungi? Af því hlytist mikill sparnaður. Undantekningar yrðu sjúkra- slökkviliðs og lögreglubifreiðar.

Skrár tengdar þessari bloggfærslu:

• Hrafninn er sífellt á iði og nokkurt fjaðrafok verður er hann birtist (hljóðrit)
• Tónsvið krumma er meira en margur hyggur. Ef til vill er þetta ástarsöngur (hljóðrit)

Listfengir hrafnar

Í þrjú ár hef ég gert nokkrar atrunnar að því að hljóðrita hrafna. Margra klukkustunda hljóðrit hafa skilað litlum árangri þar til í morgun að náðist 5-6 mínútna sæmilega heillegt hljóðrit. Þar krunkuðu hrafnar á ýmsa vegu. Þótt umferðarhávaðinn sé nokkur má þó greina að þeir sletta í góm o.s.frv.

Ég þyrfti að komast fjær umferðinni til þess að ná betri hljóðritum af hröfnum og öðru fiðurfé.

Á næstu dögum verða birt nokkur hljóðrit frá 11. og 13. mars þar sem koma við sögu vindurinn og fulgar.

Notður var Shure VP88 á miðstillingu. Hljóðneminn var hafður í Blimp-vindhlí.

Skrár tengdar þessari bloggfærslu:

• Fjölbreytileg hljóð hrafnsins og umferðarhljóð (hljóðrit)