Lýðræði með raðvali og sjóðvali

Í öllum samfélögum koma öðru hverju upp álitamál sem fólk þarf að taka afstöðu til. Má þar nefna kjör í stjórnir, prófkjör á vegum stjórnmálaflokka, tillögur um skipulagsmál, afstöðu til hvers kyns áætlana o.s.frv.

Dr. Björn S Stefánsson starfar á Lýðræðissetrinu sem er innan vébanda Reykjavíkurakademíunnar. Hann setti fyrir nokkru fram í riti sínu Lýðræði með raðvali og sjóðvali athyglisverðar kenningar um tvær aðferðir sem hægt er a beita við lausn ýmissa álitamála.

Samtalið var hljóðritað í mars 2007 um svipað leyti og Hafnfirðingar gengu til kosninga um stækkun álversins í Straumsvík.Nánari upplýsingar má finna áheimasíðu Lýðræðissetursins

http://www.abcd.is

Skrár tengdar þessari bloggfærslu:

• Lýðræði með raðvali og sjóðvali

Síðustu andartök Karítasar Jónsdóttur vestur í Skálavík

Kristín Marja Baldursdóttir skóp listakonuna Karítas Jónsdóttur í bókum sínum, Karítas án titils og Óreiða á striga. Fáar persónulýsingar hafa haft jafndjúp áhrif á mig undanfarna áratugi. Karítas fæddist vestur í Skálvík aldamótaárið 1900.

Sagan lýsir fjandsamlegri ást þeirra Karítasar og eiginmanns hennar, Sigmars Hilmarssonar sem fara hvort sína leið, en Sigmar virðist þó hafa yfirhöndina þar til síðast – eða hvað? Hún hafði heitið að hvíla honum við hlið norður á Akureyri þar sem hann var jarðaður. En skömmu fyrir 100 ára afmæli sitt sagði hún við sonardóttur sína að nú mætti það fara í heitasta helvíti, hún væri að verða hundrað ára. Héldu þær síðan vestur í Skálavík og fylgdust sonardóttirin og vinkona hennar með því hvernið sú gamla stjáklaði um í fjörunni þar til hún hvarf þeim sjónum. Ég eftirlæt lesendum bókarinnar að rifja upp lýsinguna og hvet aðra til að kynna sér bækur Kristínar.

Ég velti því fyrir mér hvað borist hefði henni Karítas til eyrna eða flogið um huga hennar um það leyti sem öndin hvarf frá henni. Þessar hugrenningar birtast í meðfylgjandi hljóðmynd.

Notað var öldugjálfur vestan úr Skálavík sem hljóðritað var þar á góðviðrisdegi 2. júlí 2009. Bætt var ofan á hljóðriti klukkna Landakirkju í Vestmannaeyjum frá 4. Des. 1999.

Öldugjálfrið var hljóðritað með Nagra Ares BB+ og Sennheiser hljóðnemum ME62, sem voru látnir mynda um 100° horn og vísuðu þeir hvor frá öðrum. Á millum þeirra var u.þ.b. 1 metri. Kirkjuklukkurnar voru hljóðritaðar með Sony minidisktæki og Sennheiser MD21U sem var hannaður árið 1954.

Skrár tengdar þessari bloggfærslu:

• Karítas Jónsdóttir

Framtíð ferskeytlunnar

Veturinn 1998 gerði ég stuttan útvarpsþátt um framtíð ferskeytlunnar. Þátturinn var verkefni á vegum hagnýtrar fjölmiðlunar við Háskóla Íslands, en ég stundaði þar nám í tvö misseri. Í þættinum er fjallað um framtíð þessarar fornu listgreinar og rætt m.a. við Steindór Andersen. Ragnar Ingi Aðalsteinsson, Pétur Blöndal o.fl. koma þar fram.

Flest sem kom fram í þættinum á enn við 12 árum síðar. Kvæðamannafélagið Iðunn hefur nú eignast heimasíðuna

http://rimur.is/

þar sem ýmiss konar fróðleik er að finna um bragfræði og íslenskan kveðskap.

Skrár tengdar þessari bloggfærslu:

• Framtíð ferskeytlunnar

Suð fyrir eyra

Fyrir nokkrum árum gerði ég þátt fyrir Ríkisútvarpið um suð fyrir eyra, en það er kvilli sem þjáir stöðugt meiri fjölda fólks.

Í þættinum er athyglinni einkum beint að súrefnismeðferð sem tíðkuð hefur verið til að draga úr suðinu. Þátturinn er birtur á þessari síðu í þeirri von að hann megi verða einhverjum að gagni.

Skrár tengdar þessari bloggfærslu:

• Suð fyrir eyra (hljóðrit)

Fuglunum gefið

 

Sunnudaginn 9. Mars árið 2008 var sólskin og svalt veður í Reykjavík. Við Elín fórum á stjá með Birgi Þór, sem var þá nýorðinn þriggja ára og gáfum fuglunum brauð.

 

Við hófumst handa við stærstu brauðsúpu á Íslandi, Tjörnina í Reykjavík.

 

Fyrsta brotið er frá tjarnarbakkanum við Vonarstræti.

Þá bregðum við okkur yfir á bakkann Tjarnargötumegin og hlýðum á svanasöng í fjarska. Þannig hljómar hann einna best.

 

Þaðan er haldið út á Seltjarnarnes og numið staðar við Bakkatjörn. Þar er fuglalíf fjölskrúðugt og þögnin umhverfis tjörnina dýpri en við Reykjavíkurtjörn.

 

Við hrekjumst að vísu þaðan vegna umferðar og nemum að lokum staðar í fjörunni í Bakkavík.

Öldurnar brotna í flæðarmálinu, við nemum skvaldur sendlinga og æðarfuglsins og á skerjunum fyrir utan brotnar brimið. Ef grannt er eftir hlustað heyrist bátur á siglingu í áttina að Gróttu.

 

Notaður var Shure VP88 víðómshljóðnemi. Skorið var af 80 riðum. Hljóðritinn var Nagra Ares BB+.

 

Skrár tengdar þessari bloggfærslu:

• Tjarnir og fjara

Kvæðið Vestmannaeyjar eftir Kristin Bjarnason

 

Íslendingar hafa sennilega ort eiginleg ættjarðarkvæði frá því á 18. Öld. Eggert Ólafsson varð einna fyrstur til þess og á næstu öld óx skáldum vorum ásmegin á þessu sviði. Á seinni hluta þeirrar aldar tóku menn að yrkja um átthagana og hafa slík átthagaljóð verið ort fram á þennan dag.

 

Kvæðið um Vestmannaeyjar

                                                          

Þjóðsöng Vestmannaeyinga, sumarmorgun á Heimaey (Yndislega eyjan mín) orti Sigurbjörn Sveinsson, skáld og kennari. Brynjúlfur Sigfússon setti lag við ljóðið og er það ævinlega sungið við útfarir roskinna eyjamanna.

 

Árið 1929 settist Kristinn Bjarnason frá Ási í Vatnsdal að í Vestmannaeyjum og gerðist þar bílstjóri. Kristinn var barnabarn bólu-Hjálmars og afi séra Hjálmars Jónssonar. Honum var skáldskapur í blóð borinn og orti talsvert í Vestmannaeyjum þau 10 ár sem hann bjó þar.

 

Árið 1936 orti hann kvæði sem hann nefndi Vestmannaeyjar. Kvæðið skyldi flutt á þjóðhátíð þá eða árið eftir sem aldrei varð. Er ekki vitað til þess að það hafi verið flutt opinberlega fyrr en í sjómannadagsþætti Ríkisútvarpsins 15. maí 1966, en Karl Einarsson sá um þáttinn og Þorsteinn Ö. Stephensen flutti ljóðið.

 

Þá stóð þannig á að tækni- og dagskrárgerðarmenn ríkissjónvarpsins voru í Vestmannaeyjum og veittu okkur heimsókn. Hljóðrituðum við tvíburarnir því þáttinn úr útvarpinu.

 

Daginn eftir hlustaði ég og varð hugfanginn af kvæðinu. Setti ég við það lag sem við frumfluttum síðan á Selfossi 6. Júní 1966. Lagið var leikið á rafmagnsorgel og blokkflautu en síðar var gerð við það kórútsetning.

 

Lagið Vestmannaeyjar hlaut fádæmagóðar viðtökur sem flautulag. Það er hins vegar erfitt til söngs og hefur því einungis verið sungið hér á landi við tvær útfarir og í fimmtugsafmæli mínu. Þá söng Barnakór útvarpsins í Beijing það árið 1983.

 

Kristinn Bjarnason og eiginkona hans koma í heimsókn

 

Þá um sumarið ferðuðumst við bræður um Suður- og Vesturland ásamt móður okkar og Magnúsi Sigurðssyni, skólastjóra, að safna fé handa Hjálparsjóði æskufólks. Gerðum við hlé á ferðinni um mánaðamótin júlí-ágúst og tókum síðan upp þráðinn um miðjan mánuðinn.

 

Þriðjudagskvöldið 9. Ágúst 1966 fórum við feðgar í okkar venjubundnu kvöldgöngu. Ég sagði pabba að við skyldum heldur hvata ferðinni því að við ættum væntanlega von á gestum.

 

Þegar við komum heim um hálftíma síðar kom mamma á móti okkur og sagði: „Það eru komnir gestir að finna þig, Arnþór. Um leið og ég sá manninn sagði ég við hann: Ég veit hvað þú heitir. Og hver heldurðu að þetta sé?"

 

Kristinn Bjarnason, svaraði ég.

 

Við áttum indæla stund með þeim hjónum og gaf Kristinn okkur ljóðabók sína. Hann las ljóð sitt um Vestmannaeyjar inn á band og er það hljóðrit birt hér. Frumritið var gert á Tandberg segulbandstæki og því miður notuðum við hægasta hraða þess eða 4,75 cm. Þess vegna er hljóðritið ekki betur úr garði gert.

 

Þetta er eina hljóðritið sem vitað er að til sé með lestri Kristins Bjarnasonar.

 

Skrár tengdar þessari bloggfærslu:

• kvae_i_vestmannaeyjar-tonstillt.mp3

Minningar frá norrænu æskulýðsmóti blindra 1982

 

Norrænt æskulýðsstarf blindra hefur staðið með miklum blóma í tæpa fjóra áratugi.

 

Árið 1982 fórum við Sævar Stefánsson á norræna mótið sem var haldið á Langalandi. Ýmislegt bar þar til tíðinda sem ekki verður fjölyrt um. Á mótinu var fjöldi fólks sem lagði sitt af mörkum til þess að gera það eftirminnilegt. Einn þeirra var Birger Kjelbye, ættaður frá Björgvin. Hann flutti norskar þjóðvísur af mikilli list.

Ein þeirra var vísan um Tönnesen og tengdamóðurina sem drukknuðu óvænt um árið. Á undan heyrist dálítið af því andrúmi sem ríkti á mótinu.

Þessu hljóðriti fylgir engin mynd. Lokið því augunum og njótið.

Hér er krækja á heimasíðu Birgis.

http://birgerkjelbye.com/

Skrár tengdar þessari bloggfærslu:

• Birger Kjelbye syngur þjóðvísu frá Björgvin

Lambhrúturinn Þorkell á Hala

Miðvikudaginn 8. júlí 2009 skoðuðum við hjónin Þórbergssetrið á Hala í Suðursveit. Eftir að hafa snætt kvöldverð í húsnæði bændagistingarinnar á Gerði gengum við um nágrennið og nutum kvöldblíðunnar. Veittum við þá athygli lambi sem haft var í stekk ásamt gamalá nokkurri sem virtist láta sér standa á sama um það.

Skýringin reyndist vera sú að lambhrútur, sem nefndist Þorkell, varð móðurlaus og tók heimilisfólkið á Hala hann í fóstur. Gamalær þessi var sett honum til samlætis í stekkinn og er löng saga af því sem ekki verður rakin hér.

Ég hljóðritaði lambsjarminn, tók síðan einn jafminn, teygði og togaði þannig að úr varð að Þorkell jarmaði íslenska þjóðlagið, Gimbillinn mælti og grét við stekkinn.

Skrár tengdar þessari bloggfærslu:

• Gimbillinn sem grét við stekkinn
• Þorkell á Hala