Stiklað á stóru um sögu kínverskrar tónlistar

Kl. 12:00 - 13:30 fimmtudaginn 18. mars ætla ég að stikla á stóru um sögu kínverskrar tónlistar. Leikin verða fjölmörg tóndæmi og ofinn dálítill fróðleikur saman við.

Árný Elínborg Ásgeirsdóttir, meistaranemi í frétta- og blaðamennsku, tók við mig útvarpsviðtal fyrir vefinn student.is og læt ég það fljóta hér með.

Skrár tengdar þessari bloggfærslu:

• Viðtal á vefútvarpsstöðinni student.hi.is

Söngstund í Gerðubergi

Frá áramótum hafa verið haldnar söngstundir í kaffistofunni í Gerðubergi. Þessar söngstundir skipuleggja þau Chris Foster og Bára Grímsdóttir og er þetta liður í hinu fjölbreytilega starfi Kvæðamannafélagsins Iðunnar. Stundirnar eru haldnar frá kl. 14:00-16:00 annan sunnudag í mánuði.

Sunnudaginn 14. febrúar komu menn saman og sungu ýmis lög sem tengdust eyjum. Þó bar þar ýmislegt annað fyrir eyru. Þar á meðal sagði Pétur Eggerz þjóðsögu.

Hér verður birt örlítið sýnishorn. Það eru dansar frá Hjaltlandseyjum, búlgarskt þjóðlag sem íslenskum áheyrendum var kennt og tvö lög í lokin sem menn sungu við raust.

Hljóðritað var með Nagra Ares-M hljóðpela. Festur var á hann víðóms-hljóðstútur.

Skrár tengdar þessari bloggfærslu:

• Söngstund í Gerðubergi

Ómarsgangan 28. september 2006

Það var eftirminnilegt þegar Ómar Ragnarsson efndi til samstöðugöngu gegn virkjun við Kárahnúka 28. september 2006. Ég hljóðritaði alla gönguna og á athyglisverða hljóðmynd af henni. Hún verður e.t.v. birt síðar. Um 10-12.000 manns sóttu útifundinn sem haldinn var eftir gönguna.

Ég gerði göngunni örlítil skil í stuttum pistli fyrir þáttinn Vítt og breitt. Hann fær að fljóta inn á þessa síðu. Í lokin er rætt við séra Jón Ragnarsson.

Notaður var Nagra Ares-M hljóðriti með áfestum víðómshljóðnema.

Skrár tengdar þessari bloggfærslu:

• Í lok Kárahnjúkagöngu

Leikur að vatni

Haustið 1999 gerði ég vinkilsþáttinn „Leikur að vatni“, en þar lék ég mér að vatni með ýmsu móti.

Leikurinn hófst í sundlaug Seltjarnarness einn lygnan laugardagsmorgun í október. Við vorum tveir í sturtunni og bað ég félaga minn, hver sem hann var, að veita mér viðtal en hann kvaðst of feiminn til þess. Ég var á leiðinni út og vildi fá hljóðmyndina af gönguferðinni. Því setti ég tækið á hljóðritun. Og viti menn. Maðurinn byrjaði að tala og úr varð þetta ágæta samtal sem hann vissi ekki að hefði verið hljóðritað.

Leikurinn barst svo austur að Geysi, Hringur Árnason, sem þá var 5 ára, sagði mér frá því til hvers hann notaði vatnið, litið var við á kínverska ballettinum Rauðu kvennaherdeildinni, haldið vestur í Skjaldfannardal og lækir látnir dansa saman, hverasvæði í Krísuvík skoðuð og loksins staðnæmst úti við Gróttu. Þar naut ég liðsinnis vinar míns, Magnúsar Bergssonar, hljóðlistarmanns, en hann hljóðritaði öldugjálfrið eina sumarnótt árið 1994. Vek ég sérstaka athygli á þeim hluta þáttarins.

Móðursystir mín, Guðfinna Stefánsdóttir, sagði mér einnig í þættinum hvernig fólk í Vestmannaeyjum hefði margnýtt vatnið á æskuárum sínum. Einnig greindi einn bræðra minna frá víngerð, en málrómi hans var breytt svo að hann yrði ekki lögsóttur. Nú er óhætt að upplýsa að hann heitir Páll Helgason, enda er málið fyrnt.

Heil mikið tilstand var vegna þessa þáttar. Ég hélt að ég gæti rumpað honum af eins og ég var vanur enda kom ég með allt efnið klippt og vandlega undirbúið. En tæknimaður Ríkisútvarpsins, Björn Eysteinsson, var mér ekki sammála og taldi handritið bjóða upp á flest annað en hroðvirkni. Eina ráðið væri að tölvuvinna þáttinn. Endirinn varð um 10 klst. vinna í hljóðveri.

Mælt er með því að fólk hlusti með góðum heyrnartólum. Dans lækjanna skilaði sér ekki nægilega vel í útsendingu útvarpsins, en hann fór þannig fram að ég stóð á mótum tveggja lækja og sneri mér nokkra hringi. Hlusti menn grannt geta þeir heyrt að tvö systkini, börn Lóu á Skjaldfönn, spyrja furðulostinn hvað ég sé eiginlega að gera.

Einn af dagskrárgerðarmönnum BBC, sem hélt námskeið fyrir starfsmenn Ríkisútvarpsins, tók þennan þátt sem dæmi um það sem hægt væri að gera með einu md-tæki og víðómshljóðnema.

Skrár tengdar þessari bloggfærslu:

• Leikur að vatni

Útvarpsstöðvar í Beijing, keisargrafirnar í Xi'an o.fl.

Um miðjan 10. áratuginn hófst merkileg þáttaröð í Ríkisútvarpinu undir nafninu Vinkill. Hafði Jón Hallur Stefánsson umsjón me´ð þáttunum. Markmiðið var m.a. að beita óhefðbundnum aðferðum við gerð útvarpsþátta.

Ég gerði nokkra vinkilsþætti árin 1998-2000. Hér birtist einn þeirra, Kínavinkill sem útvarpað var í júní 2000.

Í aprílmánuði vorum við þrenn hjón saman á ferðalagi um Kína. Í þættinum birtast nokkrar svipmyndir.

1. Forvitnast er um efni útvarpsstöðva í Beijing 11. apríl árið 2000.

2. Svipast er um við hótel í qingdao.

3Farið er í heimsókn í skóla fyrir þroskahefta.

4. Að lokum er komið við í Xi'an og leirherinn skoðaður. Wang Fanje segir frá því er hann fann menjar um leirherinn mikla árið 1974. Síðan eru nokkrar leirstyttur skoðaðar nákvæmlega. Ung stúlka, sem var túlkur á safninu, var svo ötul að vekja athygli mína á því sem fyrir augu bar að ég gafst upp á að þýða það sem hún sagði. Þetta var í annað skipti sem ég fékk að skoða þennan leirher og snerta það sem mig lysti. Einkennileg er sú tilfinning að standa frammi fyrir leirhernum og skoða nákvæmlega hvernig stytturnar voru gerðar. Maður skynjar hnoðnaglana í brynjunum, naglræturnar o.s.frv. Allt þetta og meira til, sem er luti 8. undurs veraldar, var framið 1000 árum fyrir byggð Íslands.

Skrár tengdar þessari bloggfærslu:

• Kínavinkill

Hundsmorðið - örleikur í einum þætti

Í janúar 2006 fór ég að senda Pétri Halldórssyni pistla í þáttinn Vítt og breitt. Voru sumir þeirra eins konar hljóðmyndir. Um þetta leyti var tíminn einatt lengi að liða. Ég leitaði án árangurs að atvinnu og hafði ofan af fyrir mér með ýmiss konar grúski.

Ég hafði þá fyrir nokkru fengið lánaðan Sony SM-57 víðómshljóðnema og datt í hug að sjóða saman dálítinn leikþátt. Hófst ég handa við að búa til grunninn, sem gerður var úr hljóðm sem ég hafði hljóðritað sjálfur auk hljóðrits frá danska ríkisútvarpinu.

Einn góðan veðurdag, þegar tíminn silaðist áfram, hrinti ég framkvæmdum af stað og lauk við þáttinn samdægurs eða daginn eftir. Hér gefur á að hlýða. Fordómar sögumanns ríða vart við einteyming.

Skrár tengdar þessari bloggfærslu:

• Hundsmorðið - örleikur í einum þætti

Krummi krunkar úti

Um þetta leyti ber mikið á hrafni á höfuðborgarsvæðinu. Hann skemmtir mörgum með krunki sínu og athæfi.

Þann 10. febrúar árið 2009 hitti ég að máli Ólaf Nielsen og fékk hann til að segja mér frá hrafninum. Var samtalinu útvarpað tveimur dögum síðar.

Í upphafi syngur Elín Árnadóttir, eiginkona mín, hjálparhella og vinurinn besti, lagið Krummi krunkar úti sem ég gerði handa Birgi Finnssyni, systursyni mínum árið 1967, en þá var hann á þriðja ári. Lagið er samið eftir 5 tóna skalanum og ar einhver baráttusöngur rauðu varðliðanna fyrirmyndin, en ég var þá orðinn Maoisti sem ég hef verið síðan.

Hrafnana, sem koma fram í þættinum, hljóðrituðum við Pétur Halldórsson. Notaði hann Shure VP88 en ég beitti tveimur Sennheiser ME62 sem mynduðu um 100° horn og vísuðu hvor frá öðrum. Samtalið var hljóðritað með Sennheiser ME-65, en hljóðrýmið var þess eðlis að nota varð stefnuvirkan hljóðnema.

´Serstök athygli er vakin á lokum þáttarins. Þá kemur hrafn aðvífandi, sest á handriðið, gaumgærir hljóðnemana og flýgur svo á brott í skyndi. Setjið því á ykkur góð heyrnartól og njótið hreyfingarinnar í hljóðritinu.

Skrár tengdar þessari bloggfærslu:

• Krummi krunkar úti

Helgaslysið við Faxasker 7. janúar 1950

Hinn 7. janúar 1950 fórst vélskipið Helgi VE 333 er það lenti á Skelli, boða sem er skammt austan við Faxasker.

Um svipað leyti brast á mikið ofviðri í Vestmannaeyjum sem enn er í minnum haft.

Með Helga fórust 10 menn. Tveir skipverjar komust upp í Faxasker en lík þeirra náðust ekki þaðan fyrr en um 40 stundum eftir að Helgi fórst.

Fyrri þátturinn, sem fylgir þessari færslu, fjallar um sögu Helga allt frá því að kjölur var lagður og þar til yfir lauk. Listi yfir sögumenn og aðra, sem komu að gerð þáttarins, er birtur í lok þáttarins.

Sigtryggur Helgason styrkti gerð þessa þáttar og var höfundi ómetanleg stoð og stytta. Einnig var Sigrún Björnsdóttir, fjölmiðlafræðingur, mér innan handar og gerðist sögumaður þáttarins.

Seinni þátturinn fjallar um þau þrjú skip sem fórust við Faxasker á 20. öld, en þau voru Esther, dönsk skúta, Helgi og Eyjaberg.

Þar segir m.a. frá mikilli svaðilför er Helgi fór til Bretlands í febrúar árið 1943. gunnþóra Gunnarsdóttir var lesari í þættinum ásamt höfundi.

Skrár tengdar þessari bloggfærslu:

• Helgaslysið við Faxasker 7. janúar 1950
• Faxasker. Greint er frá þremur skipum sem fórust við skerið.

Reykjavík 871 +-2

Sumarið 2006 rakst ég inn á sýninguna Reykjavík 871 +-2 á göngu okkar hjóna um borgina. Ég varð uppnuminn. Þessi sýning er á meðal hins besta sem unnið hefur verið á svið menningarsögu hér á landi. Ég vann þátt fyrir Ríkisútvarpið um sýninguna þar sem lýst er tilurð hennar og uppsetningu.

Ég vænti þess að þáttur sá sem hér er birtur virði til þess að einhverjir njóti sýningarinnar. Við hjónin höfum sótt hana nokkrum sinnum og finnum ætíð eitthvað nýtt.

Öll viðtöl og kynningar voru hljóðrituð með Nagra Ares-M. Notaðir voru Sennheiser ME62, ME65 og víðómshljóðnemi sem festur var á tækið (viðtalið við Orra Vésteinsson).

Þátturinn var unninn í Soundforge og kynningar lesnar í svefnherbergi okkar hjóna.

Skrár tengdar þessari bloggfærslu:

• rEYKJAVÍK 871 +- 2

Vernharður Bjarnason - Venni frændi

Vernharður Bjarnason fæddist 16. júní 1917 og lést 1. mars árið 2001. Hann var einhver mesti frænd æsku minnar í föðurætt, en Benedikt, föðurfaðir minn og Bjarni, faðir Venna, voru bræðrasynir. Bjarni mun m.a. hafa átt hlut að því að fá föður mínum hið góða fóstur hjá þeim hjónum, Sigtryggi Péturssyni og Hólmfríði Magnúsdóttur á Húsavík nokkru eftir að móðir hans dó frá honum rúmlega árs gömlum.

Árið 1992 bað ég Venna að rifja upp kynni sín af föður mínum, Helga Benediktssyni, athafnamanni í Vestmannaeyjum. Venni kunni einhver reiðinnar býsn af sögum og sagði betur frá en flestir sem ég hef þekkt. Varð hann vel við bón minni.

Sjö árum síðar tók ég hann enn tali og bað hann að segja mér frá kynnum sínum af vélskipinu Helga VE 333 sem fórst við Faxasker 7. janúar árið 1950. Notaði ég brot úr þeirri frásögn í útvarpsþætti sem ég gerði um slysið.

Frásagnir Venna frænda hafa aldrei verið birtar í heild. Birti ég þær nú algerlega óklipptar í minningu þeirra frændanna, föður míns og hans. Þeir áttu margt saman að sælda og þótti vænt hvorum um annan. Og móðir mín sagði um Venna að hann væri ráðabesti maður sem hún hefði þekkt og oft óskaði hún þess að Venni réði öllu hér á landi.

Njótið heil.

Skrár tengdar þessari bloggfærslu:

• Venni frændi segir frá kynnum sínum af Helga Benediktssyni
• Venni frændi segir frá Helga VE333, þar á meðal þegar 119 smálesta skipið flutti 214 tonn af vörum til Vestmannaeyja frá Fleetwood