Nýr íslenskur talgervill í burðarliðnum

 

Í dag var efnt til kynningar á nýjum, íslenskum talgervli, sem unnið er að á vegum Blindrafélagsins, félags lesblindra og fleiri aðila. Sjá m.a.

Talgervlaverkefni Blindrafélagsins

 

Nú hefjast prófanir á röddunum og er gert ráð fyrir að talgervillinn verðði jafnvel tilbúinn til dreifingar í maí á næsta ári. Honum verður dreift til blindra, sjónskertra og lesblindra notenda þeim að kostnaðarlausu.

 

Hér fylgir hljóðsýni af upplestri Dóru og Karls á texta úr íslenskri kennslubók. Tekið skal fram að ekkert hefur verið átt við leshraðann, en hann geta notendur væntanlega aukið og minnkað þegar talgervillinn hefur verið tengdur skjálesurum.

 

Skrár tengdar þessari bloggfærslu:

• Miklar væntingar eru bundnar við nýjan talgervil (hljóðrit frá 16. nóvember 2011).

Gleðidagurinn mikli í Reykjavík 6. ágúst 2011 - sameiningartákn

 

Það er óhætt að fullyrða að Hinsegin dagar og þá einkum gleðigangan séu orðin tákn þeirra sem berjast fyrir því að auðugt mannlíf sé virt og menn njóti fjölbreytileika þess. Samtök eins og aðildarfélög Öryrkjabandalags Íslands ættu að geta lært heilmikið af þeim árangri sem samkynhneigt fólk hefur náð að undanförnu. Það hefur komist svo langt að fá notið sín þrátt fyrir og vegna sérstöðu sinnar.

Þannig á það að vera um fleiri. Þeir eiga að njóta þess að vera eins og þeir eru þrátt fyrir og vegna þess að vera eins og þeir eru. Þess vegna nýt ég lífsins og nýt þess að vera blindur. Um leið vorkenni ég þeir sem vantreysta þessum fámenna hópi Íslendinga.

Við hjónin áttum þess ekki kost að taka þátt í gleðigöngunni en létum þó sjá okur í mibæ Reykjavíkur upp úr kl. 16:00. Brugðið var á loft Olympus LS-11 vasahljóðrita og andrúmsloftið fangað á Ingólfstorgi. Þaðan var haldið um Austurstræti að Arnarhóli þar sem Hera Björk gladdi mannskapinn. Beðist er velvirðingar á lökum hljóðgæðum í lokin, en þau eru eingöngu sök hljóðmeistara síðunnar.

 

In English

 

The Gaypride festival in Reykjavik has become a symbol for all groups who fight for their equal rights and want people who enjoy their life even though they are as the are and because they are as they are. The Organasation of Disabled in Iceland should learn from the struggle of the homosexuals who have learned how to enjoy their life both because and though they are as theyy are. I enjoy my blindness both because I am as I am and though I am as I am. I feel sorry for those who distrust the blind community of the world and prevent them from normal participation in the society because of lack of understanding and knowledge.

I and Elin were not able to join the March of Happiness. Later on at around 16:00 we went downtown and I recorded the atmosphere, as about 30% of the population of Iceland had gathered in the center of Reykjavik to participate in the happiness. A small Omympus LS-11 was used to capture the atmosphere. Faults in the sound quality in some parts of the recording are due to mistakes of the recorrdist.

 

Skrár tengdar þessari bloggfærslu:

• Ótrúlegur mannfjöldi á götum Reykjavíkur (hljóðrit frá 6. ágúst 2011)

Af fuglum og sauðfé á Skjaldfönn í Skjaldfannardal

Indriði Aðalsteinsson, bóndi og refaskytta á Skjaldfönn í Skjaldfannardal, heimsótti okkur hjón í gærkvöld ásamt eiginkonu sinni, Kristbjörgu Lóu Árnadóttur og fleiri gestum. Eftir rösklega spilamennsku innti ég Indriða eftir tíðarfarinu að undanförnu og áhrifum þess á kvikfé og fugla.

Við sátum úti á svölum. Klukkan var nærri miðnætti. Notaður var Nagra Ares BB+ og Sennheiser MD-21U hljóðnemi.

Skrár tengdar þessari bloggfærslu:

• Indriði á Skjaldfönn greinir frá tíðarfari og áhrifum þess á sauðfé og fugla. Tófan kemur einnig við sögu (hljóðrit frá 4. júlí 2011)

Snöggsoðinn seytjándi

Þetta er örstutt ágrip þess sem bar fyrir eyru á seytjándanum í Reykjavík árið 2011. Hafist var handa á Austurvelli, hljóðrituð lúðrasveit sú er lék þar, megininntak ræðu Jóhönnu sigurðardóttur, Karlakór Reykjavíkur og stúlknakór Kársnesskóla. Þaðan var haldið á dansleik Harmonikufélags Reykjavíkur í Ráðhúsinu um kvöldið. Þar lék Léttsveit Harmonikufélags Reykjavíkur fyrir dansi og skemmti fólk sér konunglega. Framhjá okkur fóru að mestu tónleikar á Ingólfstorgi og Arnarhóli. Olympus LS-11 neitaði að hljóðrita þá.

Reynt var að fanga umhverfi og nýtur hljóðritið sín best í góðum heyrnartólum.

Skrár tengdar þessari bloggfærslu:

• Íslensk hátíðartónlist, Jón Sigurðsson og gömlu dansarnir á seytjándanum 2011 (hljóðrit)

Krafan um arðsemi landsins

Séra Skírnir Garðarsson flutti athyglisverða prédíkun í Lágafellskirkju í gær, 15. maí. Þar gerði hann að umræðu umgengnina við landið, þar sem maðurinn skilur einatt eftir sig auðn á einum stað um leið og náttúrugæðum er veitt annað.

Prédíkunin er birt hér óstytt með leyfi séra Skírnis.

Skrár tengdar þessari bloggfærslu:

• Prédíkun séra Skírnis Garðarssona, þar sem hann fjallar um kröfuna um arðsemil landsins (hljóðrit úr Lágafellskirkju 15. maí 2011)

LÍÚ sagt stríð á hendur

Útifundur var haldinn á Austurvelli í dag í tilefni fyrsta maí. Í ræðu sinni sagði Signý Jóhannesdóttir, varaforseti Alþýðusambands Íslands, soðningaríhaldinu stríð a hendur. Fremur góður rómur var gerður að ræðu hennar eins og heyrist á meðfylgjandi hljóðriti. Ekki voru þó allir jafnánægðir. Hópur fólks hafði í frammi ólæti og beindi jafnvel reyk inn á sviðið til þess að trufla ræðuflutninginn. Skrýlslæti geta aldrei orðið hluti kjarabaráttunnar.

Að lokinni ræðu Signýjar hóf hljómsveit að leika og syngja á ensku. Hrökkluðumsv við hjónin þá af Austurvelli og hlustuðum í stað þess á eiginlega kjarabaráttu sem háð var við vesturbakka Reykjavíkurtjarnar. Þar var maður með barn sitt og gáfu öndum og mávum brauð. Þegar barnið og faðirinn héldu á brott skyldu þeir eftir nokkurt góðgæti og varð harðvítug barátta um þessar leifar.

Færra var um manninn á austurvelli en á Ingólfstorgi í fyrra. Enn var íslenskri alþýðu boðið upp á íslenska alþýðutónlist á enskri tungu. Er ekki nóg að sótt sé að íslenskunni á öllum sviðum þótt verkalýðshreyfingin ýti ekki undir hnignun hennar?

Notaður var Olympus LS-11 hljóðriti. Stafalogn var á og því þurfti ekki að skera neðan af tíðnisviðinu.

Skrár tengdar þessari bloggfærslu:

• Kjaragbarátta manna og máva (hljóðrit frá fyrsta maí 2011)

Davíð Oddsson og Jón Baldvin á ríkisstjórnarfundi

Magnús Halldórsson, útvarpsvirkjameistari, er fæddur í bolungarvík árið 1923. Hann gerði ungur munn hörpuna að lífsförunaut sínum.

Árið 2006 hljóðritaði hann nokkur lög á geisladisk hjá ríkisútvarpinu og færði mér eintak hans. Það varð til þess að ég útvarpaði við hann örstuttu samtali í þættinum Vítt og breitt 4. janúar 2007. Í lok þessa samtals flutti hann brot úr tónverki sínu sem nefnist Viðeyjarstjórnin þar sem lýst er samskiptum þeirra félaga, Jóns Baldvins Hannibalssonar og Davíðs Oddssonar. Síðar útvarpaði ég mun lengra samtali við Magnús þar sem hann sagði frá lífshlaupi sínu. e.t.v. verður það birt hér síðar.

Fyrra lagið sem heyrist er af diski Magnúsar. Tónverkið um Davíð og Jón Baldvin var hljóðritað í stofunni hjá Magnúsi. Notaður var Sennheiser ME62 og Nagra Ares-M.

Skrár tengdar þessari bloggfærslu:

• Davíð Oddsson og Jón Baldvin Hannibalsson á fundi í Viðeyjarstjórninni í túlkun Magnúsar Halldórssonar (hljóðrit frá 2. janúar 2007)

Leiðsögnin í strætisvögnum

Ýmsir fögnuðu því þegar leiðsögn var sett í strætisvagna hér á landi. Vegna kvartana var kerfið svo lágt stillt að það nýttist engum. Einhver bót hefur verið ráðin þar á en styrkurinn er ekki nægur. Sums staðar, og ég óttast að það eigi við um flesta vagnana, heyrist ekki hvað sagt er og hef ég iðulega heyrt farþega kvarta undan þessu. Vísa ég m.a. til umræðna á blogginu

http://gislihelgason.blog.is

Í gær og í dag hef ég verið á ferðinni með strætó, alls 7 sinnum. Einungis í eitt skipti mátti greina hvað sagt var.

Ég býð hlustendum að athuga hvort þeir greini orðaskil í meðfylgjandi hljóðritum. Athugasemdir verða vel þegnar.

Skrár tengdar þessari bloggfærslu:

• Á leið vestur á Seltjarnarnes með leið 13 22. febrúar 2011 (hljóðrit)
• Á leið að JL-húsinu með leið 13 23. febrúar 2011 (hljóðrit)
• á leið á Hlemm með leið 11 23. febrúar 2011 (hljóðrit)

Jólavænting

Á aðfangadagsmorgun árið 2009 útvarpaði ég dálítilli hljóðmynd sem ég nefndi Jólavæntingu. Hún var sett saman úr ýmsum áttum. Nefna má barnatíma frá Vestmannaeyjum árið 1973, söng Hrings Árnasonar frá 2007, bróðir hans, Birgir Þór, söng fyrir mig 2009 þegar hann var á 5. ári og Sunna Kristín Ríkharðsdóttir lenti í hremmingum vegna flumbrugangs Kertasníkis aðfaranótt aðfangadags í fyrra.

Njótið vel og jólist ykkur vel.

Skrár tengdar þessari bloggfærslu:

• Jólin eru hátíð barnanna. Leyrið þeim að hlusta (hljóðrit)

fyrsti maí á Austurvelli 2010

Fyrsti maí var haldinn hátíðlegur á Austurvelli. Áður en fundur hófst varð fljótt ljóst að Alþingi götunnar undir forsæti Þorvalds Þorvaldssonar léti talsvert til sín takaog setti það sérstæðan svip á samkomuna. Slóg lið hans upp skjaldborg með táknrænum áletrunum og lét allófriðlega, jarmaði, baulaði og hafði í frammi önnur götulæti.

Hér verður birt hljóðrit af nokkrum hluta fundarins. Varaformaður Eflingar flutti ávarp og í lokin flutti formaður Landsambands framhaldsskólanema ræðu. Fundinum lauk síðan með Nallaum sem Lúðrasveit verkalýðsins og Svanur fluttu. fór þá sæluhrollur um hljóðritarann og hugsaði hann um gömul og góð lög eins og Syngjum um hinn mikla, réttláta og óskeikula, kínverska kommúnistaflokk.:)

Auglýst hafði verið að hljómsveitin Hjaltalín flytti baráttutónlist. Í staðinn framdi hún hávært popp með enskum textum og lagði þannig lið þeirri viðleitni að ganga á milli bols og höfuðs á íslenskri tungu. Kunnu hennir ýmsir litla þökk fyrir.

Ég var með 2 örsmáa hljóðnema frá Sennheiser sem ég festi á gleraugnaspangir. Héldu sumir að ég væri með nýtt hjálpartæki sem hjálpaði mér að skynja umhverfi mitt.

Hljóðritað var á 24 bitum, 44,1 kílóriðum.

Skrár tengdar þessari bloggfærslu:

• Frá fyrsta maí á Austurvelli 2010
• Nallinn og upphaf fundar á Alþingi götunnar